Biology Department

ປະຫວັດຄວາມເປັນມາ

ພາກວິຊາຊີວະວິທະຍາ ສ້າງຕັ້ງຂຶ້ນພ້ອມກັບການສ້າງຕັ້ງມະຫາວິທະຍາໄລແຫ່ງຊາດ ໃນວັນທີ 5 ພຶດສະພາ ປີ 1996, ຊຶ່ງຂຶ້ນກັບຄະນະວິທະຍາສາດທໍາມະຊາດ. ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງແນວທາງນະໂຍບາຍຂອງພັກ ແລະ ລັດຖະບານ. ອີງຕາມແຜນຍຸດທະສາດ ແລະ ແຜນພັດທະນາການສຶກສາຂອງກະຊວງສຶກສາທິການ ແລະ ກິລາ ໃນການພັດທະນາບຸກຄະລາກອນທາງດ້ານວິທະຍາສາດ ເພື່ອຮັບໃຊ້ໃນການພັດທະນາເສດຖະກິດ-ສັງຄົມຂອງປະເທດ. ພາກວິຊາຊີວະວິທະຍາເປັນພາກວິຊາໜຶ່ງ ທີ່ໄດ້ພັດທະນາບຸກຄະລາກອນທາງດ້ານວິທະຍາສາດ ໂດຍສະເພາະແມ່ນນັກວິຊາການທາງດ້ານພືດສາດ, ດ້ານສັດຕະສາດ, ເຕັກໂນໂລຊີຊີວະພາບ ແລະ ນັກວິຊາການທາງດ້ານຈຸລະຊີບວິທະຍາ. ປະຈຸບັນພາກວິຊາຊີວະວິທະຍາ ມີຫຼັກສູດ 2 ຫຼັກສູດ ຄື: ຫຼັກສູດປະລິນຍາໂທ ແລະ ຫຼັກສູດປະລິນຍາຕີ. ຫຼັກສູດປະລິນຍາໂທ ມີ 2 ຫຼັກສູດຄື: ຫຼັກສູດປະລິນຍາໂທວິທະຍາສາດ ສາຂາຊີວະວິທະຍາ ແລະ ປະລິນຍາໂທວິທະຍາສາດຮູບແບບການຄົ້ນຄວ້າ ສາຂາຊີວະວິທະຍາ. ຫຼັກສູດປະລິນຍາຕີວິທະຍາສາດ ມີ 2 ສາຂາຄື: ສາຂາຊີວະວິທະຍາ ແລະ ສາຂາເຕັກໂນໂລຊີຊີວະພາບ. ເພື່ອຕອບສະໜອງໃນການພັດທະນາເສດຖະກິດ-ສັງຄົມແຫ່ງຊາດ ທາງພາກວິຊາ ກໍໄດ້ສ້າງ ແລະ ພັດທະນານັກສຶກສາ ໃຫ້ກາຍເປັນນັກສຶກສາທາງດ້ານວິທະຍາສາດ, ເປັນນັກວິຊາການທີ່ມີຄຸນນະພາບ, ມີຄວາມຮູ້, ມີຄວາມສາມາດ, ມີຄຸນສົມບັດສິນທໍາປະຕິວັດ, ມີລະບຽບວິໄນ, ມີຫົວຄິດປະດິດສ້າງ, ມີຄວາມຊື່ສັດບໍລິສຸດ, ມີອາຊີບ ແລະ ມີແນວຄິດຮັກຊາດ ທີ່ສາມາດເຮັດການຄົ້ນຄວ້າທາງດ້ານວິທະຍາສາດ ແລະ ສຶກສາຕໍ່ໃນລະດັບສູງໄດ້. ນັກສຶກສາທີ່ຮຽນຈົບຈາກພາກວິຊານີ້ ສາມາດປະກອບໄດ້ຫຼາກຫຼາຍອາອາຊີບ ເຊັ່ນ: ເປັນບຸກຄະລະກອນທາງດ້ານການສຶກສາຂອງສະຖາບັນ ແລະ ມະຫາວິທະຍາໄລ, ເປັນນັກວິທະຍາສາດປະຈຳສະຖາບັນ, ສູນຂອງຂະແໜງການວິທະຍາສາດ ແລະ ເຕັກໂນໂລຊີ ຫຼື ອົງການ-ອົງກອນອານຸລັກຂອງສາກົນ, ເປັນນັກວິໄຈທາງດ້ານປະລິມານ ແລະ ຄຸນນະພາບ, ເປັນຜູ້ປະກອບການທຸລະກິດສ່ວນຕົວ ແລະ ອື່ນໆ.

ວິໄສທັດ

ເປັນເລີດທາງດ້ານການຄົ້ນຄວ້າວິຊາການດ້ານພືດສາດ, ສັດຕະສາດ, ຈຸລະຊີບວິທະຍາ ແລະ ດ້ານເຕັກໂນໂລຊີຊີວະພາບ, ເພື່ອກໍ່ສ້າງຊັບພະຍາກອນມະນຸດໃຫ້ມີຄວາມຮູ້, ມີຄວາມສາມາດ, ມີຄຸນສົມບັດ, ຈະລິຍະທໍາ ແລະ ຄວາມສີວິໄລທາງດ້ານຈິດໃຈໃນການຕອບສະໜອງ ນັກວິຊາການທີ່ມີຄຸນນະພາບ ໃຫ້ແກ່ການພັດທະນາເສດຖະກິດ-ສັງຄົມ ຂອງຊາດ ແລະ ເຊື່ອມໂຍງກັບພາກພື້ນ ແລະ ສາກົນ.

ພາລະບົດບາດ

ສະໜອງການສຶກສາລະດັບປະລິນຍາຕີ ແລະ ຫຼັງປະລິນຍາຕີໃນການກໍ່ສ້າງ ແລະ ພັດທະນາຊັບພະຍາກອນມະນຸດໃນສາຂາຊີວະວິທະຍາ ເພື່ອຕອບສະໜອງໄດ້ທັງປະລິມານ ແລະ ຄຸນນະພາບໃຫ້ແກ່ສັງຄົມ.
ຈັດຕັ້ງການຄົ້ນຄວ້າວິທະຍາສາດ ເຊັ່ນ: ພືດສາດ, ສັດຕະສາດ, ຈຸລະຊີບວິທະຍາ ແລະ ດ້ານເຕັກໂນໂລຊີຊີວະພາບ ພ້ອມທັງເຜີຍແຜ່ຜົນຂອງການຄົ້ນຄວ້າວິທະຍາສາດ ທີ່ມີຜົນປະໂຫຍດແກ່ການພັດທະນາເສດຖະກິດ-ສັງຄົມ.
ຈັດຕັ້ງການໃຫ້ບໍລິການທາງດ້ານວິຊາການແກ່ສັງຄົມ ໂດຍພາຍໃຕ້ການຊີ້ນຳຂອງທ່ານຄະນະບໍດີ ແລະ ອະທິການບໍດີມະຫາວິທະຍາ ໄລແຫ່ງຊາດ.
ການອະນຸລັກ ແລະ ສົ່ງເສີມສິລະປະວັດທະນະທຳ, ຮີດຄອງປະເພນີອັນດີງາມຂອງຊາດກໍຄືຂອງປະຊາຊົນບັນດາເຜົ່າ ຄຽງຄູ່ໄປກັບການສຶກສາຮຽນຮູ້ແລກປ່ຽນ ແລະ ຮັບເອົາວັດທະນະທຳສາກົນຢ່າງມີການເລືອກເຟັ້ນ.
ປະຕິບັດພາລະໜ້າທີ່ອື່ນໆ ຕາມການມອບໝາຍຂອງກະຊວງສຶກສາທິການ ແລະ ກີລາ ແລະ ລັດຖະບານ.

ໜ້າທີ່

ຈັດຕັ້ງສຶກສາອົບຮົມການເມືອງ-ແນວຄິດ, ຄຸນສົມບັດ ແລະ ລະບຽບກົດໝາຍ ໃຫ້ແກ່ ພະນັກງານ, ຄູອາຈານ, ນັກສຶກສາ ແລະ ນັກຄົ້ນຄວ້າ ພາຍໃນພາກວິຊາໃຫ້ເປັນພົນລະເມືອງດີຂອງຊາດ ແລະ ມີຈັນຍາບັນໃນວິຊາຊີບຂອງຕົນ.
ຈັດຕັ້ງການຮຽນ-ການສອນວິຊາສະເພາະ ສາຂາຊີວະວິທະຍາ ແລະ ສາຂາເຕັກໂນໂລຊີຊີວະພາບ ໃນລະດັບປະລິນຍາຕີ, ປະລິນຍາໂທວິທະຍາສາດ ສາຂາຊີວະວິທະຍາ, ປະລິນຍາໂທວິທະຍາສາດຮູບແບບການຄົ້ນຄວ້າ ໃຫ້ມີຄຸນນະພາບ.
ຈັດຝຶກອົບຮົມ-ບໍາລຸງ ຍົກລະດັບວິຊາສະເພາະໄລຍະສັ້ນ ໃນສາຂາວິຊາທີ່ກ່ຽວຂ້ອງກັບພາກວິຊາ ຕາມຄວາມຮຽກຮ້ອງຕ້ອງການຂອງສັງຄົມ.
ຈັດຕັ້ງການຄົ້ນຄວ້າວິທະຍາສາດ ແລະ ພັດທະນາເຕັກໂນໂລຊີ ໃນຂະແໜງວິຊາການທີ່ກ່ຽວຂ້ອງ.
ເຜີຍແຜ່ ແລະ ນໍາໃຊ້ຜົນສໍາເລັດ ຂອງການຄົ້ນວ້າ-ວິໄຈ ທີ່ມີປະໂຫຍດເຂົ້າໃນການປັບປຸງຄຸນນະພາບການຮຽນ-ການສອນ ແລະ ການພັດທະນາເສດຖະກິດ-ສັງຄົມແຫ່ງຊາດ.
ພົວພັນຮ່ວມມືກັບສູນ, ສະຖາບັນ, ກົມ, ກະຊວງ ແລະ ອົງກອນອື່ນໆ ເພື່ອການຝຶກງານ, ທົດລອງ ຂອງນັກສຶກສາ ແລະ ການປົກປັກຮັກສາສິ່ງແວດລ້ອມ.
ໃຫ້ບໍລິການຊ່ຽວຊານ ເປັນທີ່ປຶກສາວິຊາການໃຫ້ແກ່ສັງຄົມ ໃນສາຂາຊີວະວິທະຍາ ແລະ ເຕັກໂນໂລຊີຊີວະພາບ ບໍລິການວິຊາການອື່ນໆ ທີ່ກ່ຽວຂ້ອງ.
ຈັດກິດຈະກໍາຕ່າງໆ ເພື່ອເຜີຍແຜ່ສິລະປະວັດທະນະທໍາ, ຮີດຄອງປະເພນີອັນດີງາມຂອງຊາດ ແລະ ຂອງປະຊາຊົນບັນດາເຜົ່າ.
ຊຸກຍູ້ສົ່ງເສີມໃຫ້ພະນັກງານ, ຄູອາຈານ, ນັກສຶກສາ ແລະ ນັກຄົ້ນຄວ້າ ຂອງພາກວິຊາຊີວະວິທະຍາ ໃຫ້ມີສ່ວນຮ່ວມຢ່າງຕັ້ງໜ້າໃນການອະນຸລັກ, ສົ່ງເສີມສິລະປະວັດທະນະທໍາ ແລະ ຮີດຄອງປະເພນີອັນດີງາມຂອງຊາດ ແລະ ຂອງບັນດາເຜົ່າ.
ຄຸ້ມຄອງພະນັກງານຕາມລະບຽບລັດຖະກອນ, ນະໂຍບາຍຂອງລັດຖະບານ ແລະ ນິຕິກຳຂອງມະຫາວິທະຍາໄລແຫ່ງຊາດ ແລະ ນິຕິກຳທີ່ຄະນະວິທະຍາສາດທໍາມະຊາດວາງອອກ.
ຄຸ້ມຄອງດູແລ ແລະ ພັດທະນານັກສຶກສາ ທີ່ຢູ່ໃນຄວາມຮັບຜິດຊອບຂອງພາກວິຊາຕາມຂໍ້ກໍານົດກົດລະບຽບຂອງຄະນວິທະຍາສາດທໍາມະຊາດ.
ຄຸ້ມຄອງຊັບສິນຂອງລັດ ທີ່ຢູ່ໃນຄວາມຮັບຜິດຊອບຂອງພາກວິຊາ ຕາມຂໍ້ກໍານົດກົດລະບຽບຂອງມະຫາວິທະຍາໄລແຫ່ງຊາດ ແລະ ຕາມລະບຽບກົດໝາຍຂອງລັດຖະບານ.
ຄຸ້ມຄອງດູແລຊາວຕ່າງປະເທດ ທີ່ມາປະຕິບັດໜ້າທີ່ ແລະ ສຶກສາຄົ້ນຄວ້າຢູ່ໃນພາກວິຊາ ຕາມພາລະບົດບາດ.
ປະຕິບັດວຽກງານອື່ນໆ ຕາມການມອບໝາຍຂອງຄະນະບໍດີ.

ຂອບເຂດສິດ

ຄົ້ນຄວ້າ ແລະ ສະເໜີບັນຈຸ, ຊັບຊ້ອນ, ແຕ່ງຕັ້ງ, ຍົກຍ້າຍ, ປະຕິບັດນະໂຍບາຍ, ການຍ້ອງຍໍ, ປົດຕໍາແໜ່ງ, ປະຕິບັດວິໄນສໍາລັບພະນັກງານ, ຄູອາຈານ, ນັກສຶກສາ ແລະ ນັກຄົ້ນຄວ້າ ທີ່ຢູ່ໃນການຄຸ້ມຄອງຂອງພາກວິຊາກໍຄືຄະນະວິທະຍາສາດທໍາມະຊາດ.
ນໍາໃຊ້ງົບປະມານທີ່ລັດຖະບານສະໜອງໃຫ້ ແລະ ທຶນຮອນຈາກແຫຼ່ງລາຍຮັບຕ່າງໆ ຕາມລະບຽບກົດໝາຍຂອງລັດ, ຕາມການອະນຸມັດຂອງຄະນະບໍດີກໍຄືອະທິການບໍດີ ໂດຍສອດຄ່ອງກັບງົບປະມານ ແລະ ລະບຽບການເງິນ.
ສ້າງລາຍຮັບທາງດ້ານວິຊາການດ້ວຍຮູບແບບຕ່າງໆ ທີ່ຖືກຕ້ອງຕາມກົດລະບຽບຂອງຄະນະວິທະຍາສາດທໍາມະຊາດ, ມະຫາວິທະຍາໄລແຫ່ງຊາດ ແລະ ລະບຽບກົດໝາຍ.
ປົກປ້ອງຄຸ້ມຄອງລິຂະສິດທາງດ້ານວິຊາການຂອງພາກວິຊາ ກໍຄືຂອງຄະນະວິທະຍາສາດທໍາມະຊາດ ແລະ ມະຫາວິທະຍາໄລແຫ່ງຊາດ.
ຄົ້ນຄວ້າ ແລະ ສະເໜີຂໍອະນຸມັດການຕິດຕໍ່ພົວພັນເປັນທາງການ, ຂໍອະນຸມັດເຊັນສັນຍາຮ່ວມມືທາງດ້ານວິຊາການກັບມະຫາວິທະຍາໄລ, ສະຖາບັນການສຶກສາ, ສະຖາບັນຄົ້ນຄວ້າວິທະຍາສາດ ແລະ ອົງກອນຕ່າງໆ ທັງພາຍໃນ ແລະ ຕ່າງປະເທດ ຕາມລະບຽບກົດໝາຍ.
ປະຕິບັດສິດອື່ນໆ ຕາມການມອບໝາຍຂອງຄະນະບໍດີ ຄະນະວິທະຍາສາດທຳມະຊາດ.