ພິທີສະຫຼຸບຊຸດຮຽນ 2019-2023 (ຮຸ່ນທີ 23) ຂອງຄະນະວິທະຍາສາດທໍາມະຊາດ

ພິທີສະຫຼຸບຊຸດຮຽນ 2019-2023 (ຮຸ່ນທີ 23) ຂອງຄະນະວິທະຍາສາດທໍາມະຊາດ

ໃນຕອນເຊົ້າຂອງວັນທີ 26 ກັນຍາ 2023 ເວລາ 8:30ນາທີ, ຄະນະວິທະຍາສາດທໍາມະຊາດ ມະຫາວິທະຍາ ໄລແຫ່ງຊາດ(ມຊ) ໄດ້ຈັດຕັ້ງພິທີສະຫຼຸບຊຸດຮຽນ2019-2023(ຮຸ່ນທີ23) ຂຶ້ນທີ່ຫ້ອງປະຊຸມໃຫຍ່ຂອງຄະນະວິຊາ. ໂດຍການເປັນປະທານຂອງທ່ານ ສຈ.ປອ ຮຸ່ງເພັດ ຈັນທະວົງ ຮອງເລຂາອົງຄະນະພັກ ຮອງອະທິການບໍດີ ມະຫາວິທະຍາໄລແຫ່ງຊາດ ພ້ອມດຽວກັນນີ້ກໍ່ຍັງມີທ່ານຄະນະບໍດີ, ບັນດາທ່ານຮອງຄະນະບໍດີ, ຫົວໜ້າພາກວິຊາ, ຫົວໜ້າພະແນກ, ພະນັກງານຄູ-ອາຈານ ແລະ ນັກສຶກສາປີສຸດທ້າຍ ຂອງຄະນະວິທະຍາສາດທໍາມະຊາດ ເຂົ້າຮ່ວມຢ່າງພ້ອມພຽງ.

        ໃນພິທີດັ່ງກ່າວ ທ່ານ ຮສ.ປອ ແຫຼມທອງ ລັດດາວົງ ເລຂາຄະນະພັກຮາກຖານ ຄະນະບໍດີຄະນະວິທະຍາສາດທໍາມະຊາດ ໄດ້ຂື້ນຜ່ານບົດສະຫຼຸບຊຸດຮຽນ2019-2023(ຮຸ່ນທີ23) ຫຼັງຈາກນັ້ນກໍ່ໄດ້ມອບ-ຮັບໃບປະກາສະນີຍະບັດໃຫ້ຜູ້ທີ່ສໍາເລັດການສຶກສາ ຈໍານວນ 334ຄົນ, ເປັນເພດຍິງ 126ຄົນ (ພິເສດ: ມີນັກສຶກສາທີ່ໄດ້ຮັບໃບປະກາສະນີຍະບັດກຽດນິຍົມ ຈໍານວນ 19ຄົນ ຄື: ສາຂາເຄມີສາດ 02 ຄົນ, ສາຂາເຄມີສິງແວດລ້ອມ 01ຄົນ, ສາຂາຄະນິດສາດ 01ຄົນ, ສາຂາສະຖິຕິ 01ຄົນ, ສາຂາວິທະຍາສາດຄອມພິວເຕີ 05ຄົນ, ສາຂາການພັດທະນາເວບໄຊ 06ຄົນ ແລະ ສາຂາການພັດທະນາໂປຣແກຣມຄອມພີວເຕີ 03ຄົນ) ແລະ ພ້ອມດຽວກັນນີ້ ກໍ່ຍັງໄດ້ມີການມອບໃບຍ້ອງຍໍໃຫ້ຜູ່ທີ່ມີຜົນງານດີເດັ່ນ ໃນການສຶກສາຄົ້ນຄວ້າຮໍ່າຮຽນ ແລະ ການເຄື່ອນໄຫວກິດຈະກໍາຕ່າງໆ ຕະຫຼອດຊຸດຮຽນ ລວມທັງໝົດ 316ຄົນ, ເພດຍິງ 114 ຄົນ ໃນນັ້ນສາມາດຍາດໄດ້ຜົນງານຜົນເດັ່ນຮອບດ້ານ ຈໍານວນ 126ຄົນ,  ຍິງ 41ຄົນ, ດີເດັ່ນດ້ານການຮຽນ ຈໍານວນ 17ຄົນ, ຍິງ 41ຄົນ ແລະ ດີເດັ່ນດ້ານການເຄື່ອນໄຫວກິດຈະກໍານອກຫຼັກສູດ ຈໍານວນ  173ຄົນ, ຍິງ 66ຄົນ. 

        ໃນຕອນທ້າຍຂອງພິທີ ຍັງໄດ້ຮັບຟັງການໂອ້ລົມ ຂອງທ່ານ ສຈ.ປອ ຮຸ່ງເພັດ ຈັນທະວົງ ຕໍ່ກັບພະນັກງານ-ຄູອາຈານ ແລະ ນັກສຶກສາຜູ້ທີ່ສໍາເລັດການສຶກສາໃໝ່ ເພື່ອເປັນແນວທາງໃນການປະຕິບັດໜ້າທີ່ວຽກງານໃນຕໍ່ໜ້າ ແລະ ພິທີດັ່ງກ່າວກໍ່ໄດ້ປິດລົງຢ່າງມີຜົນສໍາເລັດຈົບງາມ ໃນເວລາ 10: 30 ນາທີ ຂອງວັນດຽວກັນ.